Det er etterkvart interesse for dogmestrikk. ( eg anar ikkje kvifor det heiter dogmestrikk, men dette henta eg frå nynorskordboka: Ordet dogma kjem av gresk dogma ‘meining’, av dokein ‘meine’;Døme: kyrkjeleg læresetning, og: oppfatning som ein (utan prov eller grunngjeving) går ut frå er sann. Døme: politiske dogme. Dette gir jo ikkje heilt mening, men uansett; når du “dogmestrikkar” , strikkar du direkte frå rå ull som ikkje er karda eller spunne først. Eg har prøvd meg litt fram, og det som eg spesielt merkar meg, er at resultatet vert veldig mjukt. Det er jo interessant. Det vert lett litt klumpar, og arbeidet vert litt boblete, men også artig og interessant. Det kjem jo litt an på ulla du brukar, di meir tova og ujamn ho er, di meir boblete resultat. Det er fint om det er passeleg med lanolin, lanolinet gjer at fibrane heng betre saman. Sidan det ikkje vert noko tvinn på ulla som vert strikka, vert det som nemnd over veldig mjukt. Eg tenkjer med ein gong på at denne måten å lage plagg på, passar til kroppsnære plagg. Difor vil eg prøve meg på hals og huve. Eg starta med ein prøvelapp, som de kan sjå under. Ulla er frå Vete Rosadotter, som går rett utanføre og er ein veldig fin og snill sau Ho har ikkje den aller mjukaste ulla, men når eg brukte ulla slik, vart resultatet veldig mjukt likevel. Interessant! Dette er Vete Rosadotter:
Om nokon har lyst å dogmestrikke med meg her i Gripen, send meg ein epost, og så samlar me oss i ein gjeng. Eg har ull til alle, men ta med strikkepinnar, så de kan ta strikkinga med heim etterpå utan å dra pinnane ut. Pinnestorleik 3-6 passar best. Så kan me prate og drikke te eller noko samstundes. Det går såpass fort, at ein nesten kan verte ferdig med noko på ein kveld. Kom igjen då! Kom og dogmestrikk! (så kan me finne eit betre namn medan me strikkar)
